НСУР-2040: Беларусь працягне прытрымлівацца траекторыі ўстойлівага экалагічнага развіцця

Працягваем расказваць аб тым, якім бачыцца аблічча будучыні нашай краіны праз прызму Нацыянальнай стратэгіі ўстойлівага развіцця Рэспублікі Беларусь да 2040 года.

«Тры кіты» устойлівага экалагічнага развіцця:

забеспячэнне бяспечнага і экалагічна чыстага навакольнага асяроддзя

захаванне і рацыянальнае выкарыстанне прыродных рэсурсаў

развіццё цыркулярнай эканомікі.

У сферы экалагічнай бяспекі прыярытэтам з'яўляецца мінімізацыя негатыўных наступстваў кліматычных змен, зніжэнне шкодных выкідаў у навакольнае асяроддзе, фармаванне экалагічнай культуры.

«Зялёны» вектар развіцця прадугледжвае з'яўленне ўсё большай колькасці рэсурсаэфектыўных і больш чыстых вытворчасцей, дзе адходы актыўна выкарыстоўваюцца ў якасці другаснай сыравіны. Гэтаму будуць садзейнічаць шэраг дзейсных стымулаў: «зялёнае» падаткаабкладанне, «зялёныя» дзяржаўныя закупкі, інструменты падтрымкі «зялёнага»фінансавання і інш.

Ставяцца задачы па павелічэнні да 2040 года долі асабліва ахоўных прыродных тэрыторый да 9,3 працэнта, павышэнню ўдзельнай вагі паверхневых водных аб'ектаў, якія маюць «добры» і «выдатны» экалагічны статус, да не менш як 85 працэнтаў, зніжэнню плошчы парушаных зямель да 1 тыс. га.

Перабудова галін на «зялёныя» рэйкі прадугледжвае эфектыўнае і рацыянальнае выкарыстанне прыродна-рэсурснага патэнцыялу, адказную вытворчасць і спажыванне.

У рамках развіцця цыркулярнай эканомікі атрымаюць паскоранае развіццё сферы і напрамкі, якія прапануюць варыянты падаўжэння жыцця тавараў: паўторнае выкарыстанне, арэнду і рамонт.

Для гэтага плануецца ўкараненне новых арганізацыйных бізнес-мадэлей, нацэленых на рост эфектыўнасці выкарыстання існуючых актываў і рэсурсаў, такіх як экапрамысловыя паркі, сеткі прамысловага сімбіёзу, шэрынгавыя платформы, інфармацыйныя рэсурсы, якія папулярызуюць даныя бізнес-мадэлі.