Марыя Мажынская: прадпрыемствы павінны выпрацоўваць стратэгіі свайго далейшага развіцця

Аб гэтым заявіла сёння, 18 кастрычніка 2024 г., намеснік Міністра эканомікі Марыя Мажынская падчас сваёй паездкі ў Магілёўскую вобласць.

Рабочы дзень намеснік кіраўніка эканамічнага ведамства пачаўся з удзелу ў пасяджэнні Клічаўскага райвыканкама аб выніках сацыяльна-эканамічнага развіцця і выкананні бюджэту раёна за 9 месяцаў 2024 года.

«Асноўныя галіны раёна па выніках 9 месяцаў дэманструюць добрую дынаміку. Арганізацыі нарасцілі выручку больш як на чвэрць, павялічылася рэнтабельнасць продажаў. Гэта садзейнічае росту даходаў насельніцтва: сярэдні заробак у студзені-верасні павялічыўся на 22,5%.

Важна, што прадпрыемствы актыўна ўкладваюць у сваё далейшае развіццё – інвестыцыі ў асноўны капітал выраслі на 23,6%», – адзначыла Марыя Мажынская.

У працяг рабочай паездкі намеснік міністра эканомікі наведала шэраг прадпрыемстваў Магілёўшчыны – ТАА «Норд Рывер», УЧ НВП «Тэхналіт», ААТ «Магілёўдрэў» і «Магілёўскі домабудаўнічы камбінат».

Марыя Мажынская азнаёмілася з вытворчасцю, абмеркавала з кіраўнікамі праблемныя пытанні дзейнасці прадпрыемстваў, перспектывы развіцця, а таксама ход рэалізацыі інвестпраектаў.

«Каб заставацца канкурэнтаздольнымі на рынках, быць упэўненымі ў заўтрашнім дні неабходна выпрацоўваць стратэгіі свайго далейшага развіцця, інвеставаць у тэхналагічнае абнаўленне і мадэрнізацыю. Важна больш актыўна ўзаемадзейнічаць з тавараправоднымі сеткамі, удзельнічаць у тэхналагічных ланцужках прамысловых гігантаў, павышаць долю айчыннай сыравіны і камплектуючых у сваім прадукце», – падкрэсліла намеснік міністра эканомікі.